Ég hef fengið gleðina aftur! Tilhugsunin um danska í ár eða tvö í viðbót var farin að hafa verulega slæm áhrif á mig en mikið líður mér vel og skemmti ég mér á þessu nýja mataræði!

Í gær t.d. fékk ég mér súkkulaðiís sem ég gerði með nýju ísvélinni minni. Samt var dagurinn í kringum 1200 kaloríur! Pælið í því!

Á sunnudaginn ætla ég svo að bjóða ömmu og afa í kaffiboð og mun þá bjóða upp á rabbabarapæ með heimatilbúnum vanilluís. Í hádegismatinn ætla ég að fá mér hamborgara með öllu tilheyrandi, samt verður dagurinn undir 1500 kaloríum!

Já, frelsið er yndislegt ef maður kann að höndla það og enn sem komið er stend ég mig bara glimrandi. Ég finn samt alveg að hættan eykst þegar mataræðið er orðið frjálslegra, hugsunin um að fá sér smá nammi og telja það bara með er til staðar en ég ætla að standast þetta, hef ekkert með nammi að gera!

Ég er ennþá að pæla í GI stuðlinum og er að aðlaga hann að mínu mataræði hægt og rólega, þarf að leggjast yfir bækurnar mínar þegar ég hef tíma, svaka plan fyrir helgina svo það verður lítill tími þá.

Ætla að gefa ykkur uppskriftina af ísnum mínum, hann er náttúrulega ekki danskur fyrir fimm aura en þið hinar sem eruð að telja kcal getið notað hann!

Súkkulaðiís að hætti Dídíar

1 dós sýrður rjómi (10%)
2 dl fjörmjólk
50 – 100 g xylitol (eftir smekk)
50 g 70% súkkulaði, skorið í bita

Blandið saman öllum hráefnum í blandara og setjið síðan í ísvél (ég nota philips). Ísinn er tilbúinn á hálftíma.

Þetta er skammtur fyrir 4. Hver skammtur er þá 200 kaloríur sé miðað við 100 g af xylitol. Mér finnst 50 g alveg nóg en ég er orðin svo óvön sykri að það er kannski ekki að marka. Ef notuð eru 50 g þá er skammturinn 175 kcal.

Svo er sjálfsagt hægt að nota undanrennu og 5% sýrðan til að spara enn frekar kaloríur, veit samt ekki hvort hann kæmi jafn vel út.

Fyrir ykkur dönsku sem gerið ís og notið mikið af undanrennudufti þá vil ég benda ykkur á xylitol, þetta er náttúrulegur sykur sem hefur ekki áhrif á blóðsykur nema þá frekar lækkandi. Færri kcal eru í honum en undanrennuduftinu (240 vs. 358) og þá sleppiði líka við að setja gervisætu. Auðvitað ekki by the book en samt ekkert verra en undanrennuduftið!

Um daginn gerði ég svo bananaís sem þið á danska gætuð alveg gert ef þið þorið að nota xylitol. Hann var svona:

Bananaís

1 banani
50 g xylitol
1 dós sýrður rjómi (10%)
2 dl fjörmjólk
10 g jarðhnetuolíu (eða önnur bragðdauf)
1 msk limesafi

Bananinn og xylitolið er þeytt saman og síðan restinni blandað út í. Þessu hellt í ísvélina og er tilbúið á 30-40 mínútum.

Sé þessu deilt í fjóra skammta þá er hver skammtur 150 kcal eða 1 1/2 mjólkurskammtur, 1/4 ávöxtur og 1/2 x fita. Xylitol telst svo ekki eins og undanrennuduftið myndi ekki teljast.

Jæja, ætli ég sé ekki búin að blaðra ykkur í kaf kellurnar mínar. Kveð núna áður en þið sofnið yfir lestrinum!