Ég fór ekki í vigtun í dag, var sko ekki tilbúin að missa af sekúndu af Eurovision þakka þér fyrir!

En ég steig á vigtina hér heima og samkvæmt henni hef ég misst 400 grömm, ekki mikið það en niður er víst alltaf niður.

Svo er ég búin að vera í pínu pælingum, held að ég sé vaxin upp úr danska kúrnum. Ég er komin á þann stað núna að mér finnst danski vera meira að hamla mér en hjálpa. Einhverjar eiga sjálfsagt eftir að spá af hverju ég ætli að hætta á einhverju sem er svona greinilega að virka fyrir mig. Ástæðan er sú að þótt ég sé að missa kíló þá er það ekki endilega það eina sem maður er að hugsa um. Mér vil líða vel á meðan ég er að gera þetta, ég vil gera þetta sem lífstílsbreytingu en ekki sem kúr og staðreyndin er bara sú að danski er ekkert annað en kúr í mínum augum. Ég vil ekki borða eins og danski segir það sem eftir er lífs míns og þessvegna er ég alltaf að hugsa “þegar ég verð komin í kjörþyngd þá…” og svona hugsunarháttur er ekkert að hjálpa mér! Eins finnst mér danski viðhalda græðgis- og kvöldáti þar sem ég þarf alltaf að vera að hugsa um mat, hugsa um að klára hinn og þennan skammtinn.

Þið megið ekki skilja þetta svo að ég sé hætt, búin að gefast upp! Alls ekki! Þetta er engin uppgjöf og ég vona að þið sjáið það og standið að baki mér í þessu því ég þarf líka stuðning núna, jafnvel meiri en upp á síðkastið.

Ég mun að nokkru leyti fylgja grunnhugmyndum danska, mikið grænmeti, mikið af ávöxtum, góðar olíur, góð prótín etc. Ég ætla hinsvegar ekki að hengja mig í skammtastærðum, ef ég vil eins ostsneið í stað 25 gramma þá fæ ég mér það, ef ég vil þrjár sneiðar af grófu brauði einn daginn þá fæ ég mér það, ef ég vil enga mjólk og ekkert brauð einn daginn þá fer ég ekki að troða því ofan í mig. Þetta mataræði verður einnig byggt að miklu leiti á hugmyndum um sykurstuðulinn en hann er ég búin að vera að kynna mér lengi núna. Fyrir þá sem vilja kynna sér hann er hægt að gúgla glycemic index eða GI. GI mataræði gengur semsagt út á jöfnun blóðsykurs og hef ég mikla trú á þessu mataræði til frambúðar fyrir mig.

Ég ætla semsagt að leggja danska á hilluna í 4-5 vikur og sjá hvernig þetta gengur fyrir sig. Ef ég sé að þetta er ekki að virka, ég er ekkert að léttast eða jafnvel að þyngjast þá tek ég danska aftur upp.

Ætla að vigta mig í fyrramálið, fyrir morgunmat og svo vikulega héðan í frá á miðvikudagsmorgnum. Verður forvitnilegt að sjá hvernig þessi tilraun mín kemur út.